«Ծնվել եմ Արցախում» ծրագիրը հզորացնում է արցախցի երիտասարդ երաժիշտներին

Անուշ Աղաջանյանը «Ծնվել եմ Արցախում» ծրագրի 23 պատանի մասնակիցներից մեկն է։ Նա ծնվել է Ստեփանակերտում՝ երաժիշտների ընտանիքում և ջութակն իր կյանքի անբաժան մասն է եղել վաղ մանկությունից։ 2023 թվականի բռնի տեղահանությունից հետո տասնամյա Անուշն իր երաժշտական ուղին շարունակել է Հայաստանում, իսկ «Ծնվել եմ Արցախում» ծրագիրն օգնում է, որ նրա սերը երաժշտության հանդեպ վերածվի իրական հնարավորությունների։

Անուշի աճող մասնագիտական ճանապարհին կարևոր էր ունենալ գործիք, որը համապատասխանում է իր տարիքին և տաղանդին։ Խորվաթիա-Հայաստան համայնքի փոխնախագահ Էվա Կիրխմայերի աջակցությամբ Անուշն այժմ ունի բոլորովին նոր ջութակ, որը հնարավորություն կտա զարգացնելու իր հմտությունները։ «Ծնվել եմ Արցախում» ծրագրի շրջանակում մասնակից երեխաների համար երաժշտական գործիքների տրամադրումը ստանձնել է «Մենք ենք մեր սարերը» զարգացման գործակալությունը։

Անուշի պատմությունը խորհրդանշում է ծրագրի ողջ իմաստն ու նպատակը՝ երաժշտության միջոցով փոխել կյանքեր և նոր հույս տալ պատերազմից ու տեղահանությունից տուժած երիտասարդներին։ Նրա աչքերում արտացոլվում է այն հավատն ու ուժը, որ երաժշտությունը կարող է բերել նույնիսկ դժվարագույն ժամանակներում։

«Խորապես շնորհակալ ենք Խորվաթիայի մեր բարեկամներին, հատկապես Կարինե Ֆիլիպովիչին և Էվա Կիրխմայերին։ Այդպիսի սրտացավ նվիրատուների աջակցությամբ մենք ոչ միայն տրամադրում ենք անհրաժեշտ գործիքներ, այլև կառուցում ենք ապագա, որտեղ Արցախի երիտասարդները կարող են զարգանալ և փայլել», - նշել է «Ծնվել եմ Արցախում» ծրագրի ղեկավար Յանա Ավանեսյանը։

--

«Ծնվել եմ Արցախում» կրթական ծրագրի նպատակն է պահպանել և զարգացնել Արցախում ծնված, այսօր Հայաստանում ապրող տաղանդավոր պատանի երաժիշտների մշակութային ժառանգությունը։ Ծրագրի գաղափարը Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր, UNICEF-ի ազգային դեսպան Սերգեյ Սմբատյանինն է։ Ծրագրի շրջանակում ընտրված 23 պատանի երաժիշտներ 5 տարի շարունակ ստանալու են խորացված մասնագիտական կրթություն և հնարավորություններ՝ ելույթ ունենալու աշխարհի տարբեր բեմերում հնչեցնելով՝ «Ծնվել եմ Արցախում» արտահայտությունը։

Ծրագիրն իրականացվում է «Մենք ենք մեր սարերը» զարգացման գործակալության, «Հայաստան»համահայկական հիմնադրամի Գերմանիայի և Նիդերլանդների տեղական կառույցների, Ամերիկայի հայ ավետարանչական ընկերակցության Հայաստանի մասնաճյուղի և անհատ բարերարներ՝ Յուրի Նավոյանի, Կարո Սարգսյանի և Հայկ Եգանյանի աջակցությամբ։